Hikayat

HIKAYAT
PENERAPAN POLMAS LAM MASYARAKAT


Deungon Bismillah lon peuphon Kalam
Allah Yang Rahman lon seubot nama
Alhamdulillah pujoe sanjongan
Bandum pujian woe keu Rabbana

Seulaweut saleum akan janjongan
Panghulee alam saidil ambiya
Yang peutrang donya ngon cahya Islam
Yang tanom iman di dalam dada

Rahmat Sijahtra teuma oh lheuh nyan
Keumandum taulan sidang pembaca
Ulon kalon tan lon turi pih han
Tapi lagee sang saboh kandong ma

Keu Pak polisi ngon ibuk Polwan
Saleum lon layang bandum beurata
Jaroe lon beu-ot bri penghormatan
Siaaaap.. Komandan... lon tabek sigra

Hajat lon tuleh saboh khabaran
Lon jok keu rakan keu tanda mata
Meu kru seumagat Rahmat bak Tuhan
POLMAS dengon HAM lon cuba rika

Donya ka akhe lahe ta pandang
Buet keujahatan meurajalela
Memacam bagoe dum keujadian
Haba bak koran kayem tabaca

Tadingo sinoe na penculikan
Sideh hai rakan ka diperkosa
Na yang jirampok nyawong meulayang
Na yang ka mumang keunong Narkoba

Troh bak aneukmiet ka jeut keu korban
Kadipeudagang lagee boneka
Aneuk sikula rame tawuran
Meulho bak jalan peulumah teuga



Lam masyarakat pih cukop sayang
Pelanggaran HAM syit ka biasa
Miseu keu contoh na pelecehan
Troh kakerasan lam rumoh tangga

Bak pak polisi tan troh laporan
Lagee – lagee sang kureung peucaya
Polisi ngon rakyat jioh hubungan
Kureung dukungan keurija sama

Meumacam bagoe geupegah saran
Macam aturan kalheuh geupeuna
Tapi oh ta eu lam kenyataan
Buet keujahatan payah that reuda

Pihak polisi bahpih syit meunan
Hana tom bosan sabe usaha
Sabe geupeugot pembaharuan
Langkah geurancang meubagoe cara

Peugot seminar ngon penataran
Penelitian pih hana reuda
Pat yang na meutheun geukaji ulang
Yang kureung timang peutupat sigra

Ngon naggroe lua studi bandingan
Cok peungalaman cara keurija
Miseu keucontoh ” KOBAN” di Jeupang
Aleh peutra nan di Singapura

Di Amerika pih na teuladan
Penegakan HAM cukop that nyata
Polisi – Masyarakat got that ikatan
peugot hubungan keurijasama

Meunan keuh jinoe ka geuterapkan
Geuchi peujalan di Indonesia
Ngon masyarakat peukong ikatan
Peugot keu rakan sibagoe mitra

Polisi Masyarakat teuma geubohnan
POLMAS singkatan mangat ta ija
Saboh filosofi kon hanya slogan
Kon keu piyasan keu gura – gura


Deungon na POLMAS lam kebijakan
Rayek harapan troh cita – cita
Harap beukurueng dum keujahatan
Deungon dukongan bak rakyat dumna

Tujuan POLMAS wahe e rakan
Saboh kemitraan jinoe geubina
Polisi ngon rakyat beuna sejalan
ceugah kejahatan Keurija sama

Dua komponen yang that geutekan
Phon kemitraan peukong syedara
Peusaboh hate pike beusaban
Peugot hubungan saleng peucaya

Peuseuleusoe masalah teuma oh lheuh nyan
Hana sikhan – khan bak mat perkara
Dumna masalah wajeb peucahkan
Pakriban jalan pakat beusama

Teumpat meureumpok teuka pikiran
Geupeugot teuman Forum bersama
FKPM forum geuboh nan
Forum kemitraan menankeuh makna

Meubagoe unsur geugabong keunan
Keu perwakilan geucok anggota
AD / ART geutanda tangan
Ngat na aturan bek ban nyang hawa

Geumusyawarah dalam forumnyan
Suson rancangan langkah keurija
Sibuleun sigo peugot laporan
Mangat transparan saleng terbuka

Keu masyarakat geubri arahan
Ngon pendekatan yang bijaksana
Supaya meuphom hukom atoran
Bandum geupeutrang peugah beunyata

Masalah ubit lam masyarakat
Ngon hukom adat geuyue usaha
Jeut peuseluesoe bek roh aparat
Asai beutupat bek na yang dawa




Masalah rayek bek syit takarat
Teutap cok kiblat hukom pidana
Bah geuseuleusoe uleh aparat
Geutanyoe rakyat hana kuasa

Keu masalah HAM geuyue horeumat
Bek na le rakyat yang teu-ilanya
Yang hana meuphom geupetrang leugat
Teuntang hakikat hak manusia

Beuna tateupeu wahe e taulan
Dum hamba Tuhan derajat sama
Hana meubeda puteh ngon hitam
Meunan syit taulan gasien ngon kaya

Bandum saban hak lam kehidupan
Na kebebasan hudep lam donya
Kasep geuato lam undang - undang
Bek na hai rakan yang teu inanya

Wajib teulindong kelompok rentan
Kelompok rawan keunong inanya
Miseu aneuk miet umu belasan
Sabab aneuknyan hana meudaya

Keu ureung inong teuma oh lheuh nyan
Peureulee lindungan bek na yang siksa
Meunan syit bagoe kawom pendatang
Perlee lindungan tabri suaka

Kelompok agama ngon kepercayaan
Group pergaulan nyang dit anggota
Bandum awaknyan teulindong ngon HAM
Bek barangkaban geutanyoe ceuca

Peutra kaitan POLMAS deungon HAM
Teuntee hai rakan hubungan jih na
Deungon na polmas lam kebijakan
Penegakan HAM teujamin nyata

Berkat na POLMAS lam kebijakan
Le perkembangan takalon nyata
Polisi ngon rakyat ka kong ikatan
Penerapan HAM ka terlaksana




Oh noe keuh jilee haba lon karang
Meuah hai rakan meunyo na gasa
Sigolom lon top bacut lon saran
Keu kebaikan tanyoe bersama

Beudoh rakan lon inong ngon agam
Sama berjuang tajaga bangsa
Keu pak polisi tabri bantuan
Sumbang pikeran dengon teunaga

Keu Pak polisi bek brok dugaan
Bek na hai rakan rasa curiga
Keurija sama peunteng tagalang
Ngat troh tujuan aman tarasa

Oh na masalah bagah laporan
Bek na teukambam teurahasia
Asai kameubee ngon keujahatan
Cuegah berijang bek sampe raya

Deungon Fatihah haba ulon top
Jaroe lon rahop laju bak muka
Tamat riwayat bah that hanagot
Lon boh lam amplop lon jok keu gata

Ateuh syedara jaroe lon beu-ot
Lon angkat salot soe soe yang baca
Harap beu meu`ah pat – pat yang karot
Bekna neucarot upat ngon ceula